Mae beicio bob amser wedi chwarae rhan fawr ym mywyd Margaret, yma mae hi'n dweud wrthym pam mae'r Rhwydwaith Beicio Cenedlaethol mor agos at ei chalon.
Margaret ar y RhBC
Rhaid i mi gyfaddef ar y dechrau ... dwi'n gaeth i’r Rhwydwaith Beicio Cenedlaethol!
Digwyddodd hyn yn rhannol oherwydd fy mod wedi bod yn ffodus i fyw dim ond 1KM o un o brif lwybrau’r RhBC am 25 mlynedd. Mae wedi fy nhynnu i mewn fel ffordd hawdd, dawel, ddi-draffig, heb dagfeydd i gyrraedd y gwaith gan ryddhau fy meddwl, ac yn bwysicach fyth, ffordd o gyrraedd gartref. Pan agorodd ein cyngor lleol lwybr diogel drwy ein parc gyda'r nos dyna ni; doedd dim cystadleuaeth rhwng taith feicio 20 munud, taith gerdded 40 munud neu dros 40 munud ar fws.
Mae'r RhBC yn ei gwneud mor hawdd i gynllunio, ac ar y cyfan mae'n darparu safon y gallwch ddibynnu arni o lwybrau sy'n aml yn ddi-draffig a bron bob amser yn glir, yn ogystal ag arwyddion i ddangos y ffordd i chi.
Yma yn ne Cymru rwy'n ymwybodol iawn o ba mor lwcus ydyn ni i fod â llwybrau beicio i fyny'r rhan fwyaf o'n Cymoedd, bron pob un ohonynt ag arwyneb o safon dderbyniol.
Rwy'n credu fy mod i'n angerddol am y RhBC oherwydd rydw i bob amser wedi beicio. Roeddwn i'n ddigon ffodus i gael fy magu gyda theulu oedd â beiciau fel eu hunig ddull o deithio - er efallai nad oeddwn yn meddwl fy mod yn lwcus ar y pryd.
Cyn gynted ag yr agorodd cyngor lleol Margaret lwybr diogel trwy'r parc gyda'r nos, dechreuodd gymudo'n rheolaidd ar feic.
Yn y dyddiau hynny, roedden ni’n tueddu i gadw at lwybrau lleol oedd yn gyfarwydd i ni, gan y gallai mentro ymhellach i ffwrdd fod yn anodd; roedd angen mapio, mesur ac archwilio pa mor agos oedd y cyfuchliniau ar dir anhysbys. Y dyddiau hyn, mae mapio ar-lein a dulliau digidol eraill yn ei gwneud yn hawdd dilyn llwybrau wedi'u cynllunio ymlaen llaw ac archwilio proffiliau llwybrau cyn mentro allan.
Fel y gwelwch, dyna’r peth am y RhBC, mae’n mynd â chi i lefydd nad oeddech chi erioed wedi meddwl y byddech chi'n ymweld â nhw, yn rhoi cyfle i chi weld golygfeydd godidog; mae bron bob amser yn cynnwys caffi, ac yn y pen draw mae’n eich tynnu chi i mewn i’w rwydwaith.
